Türkmenistanyň Prezidenti iş maslahatyny geçirdi
Hormatly Prezidentimiz Gurbanguly Berdimuhamedow Ministrler Kabinetiniň Başlygynyň käbir orunbasarlarynyň, harby we hukuk goraýjy edaralaryň birnäçesiniň ýolbaşçylarynyň gatnaşmagynda iş maslahatyny geçirdi. Onda içeri we daşary syýasatyň ilkinji nobatdaky wezipeleri, “Türkmenistanyň Prezidentiniň ýurdumyzy 2018 — 2024-nji ýyllarda durmuş-ykdysady taýdan ösdürmegiň Maksatnamasy”, şeýle hem ata Watanymyzy has-da ösdürmäge, ilatyň durmuş derejesini ýokarlandyrmaga gönükdirilen milli we pudaklaýyn maksatnamalary amala aşyrmagyň barşy hem-de döwlet durmuşyna degişli beýleki möhüm meseleler ara alnyp maslahatlaşyldy.
Milli Liderimiz gün tertibine geçmek bilen, Ministrler Kabinetiniň Başlygynyň orunbasary, daşary işler ministri R.Meredowa söz berdi. Wise-premýer ýurdumyzyň 2017 — 2023-nji ýyllar üçin daşary syýasy ugruny durmuşa geçirmek babatda DIM-niň alyp barýan işleri, döwlet Baştutanymyzyň ozal beren tabşyryklarynyň ýerine ýetirilişi barada hasabat berdi.
Hormatly Prezidentimiz Gurbanguly Berdimuhamedow hasabaty diňläp, ýurdumyzyň gyzyklanma bildirýän ähli hyzmatdaşlar bilen halkara hyzmatdaşlygy oňyn ösdürýändigini aýtdy hem-de daşarky gatnaşyklary giňeltmek üçin uly mümkinçilikleriň bardygyny belledi. Şunuň bilen baglylykda, ýakyn döwür üçin Daşary işler ministrliginiň işiniň ileri tutulýan ugurlary kesgitlenildi. BMG-niň Baş Assambleýasynyň hem-de beýleki abraýly halkara forumlaryň belent münberinden beýan edilen dünýä we sebit meseleleri boýunça ýurdumyzyň netijeli başlangyçlaryny durmuşa geçirmek boýunça yzygiderli işler möhüm wezipe hökmünde bellenildi.
Döwlet Baştutanymyz häzirki wagtyň ýagdaýlaryny nazara almak bilen özara bähbitli hyzmatdaşlygy has-da giňeltmek üçin bar bolan mümkinçilikleri netijeli peýdalanmagyň möhümdigine ünsi çekip, wise-premýere, DIM-niň ýolbaşçysyna daşary syýasat edarasynyň hem-de diplomatik düzümiň öňünde goýlan möhüm wezipeleri çözmek bilen bagly anyk tabşyryklary berdi.
Soňra Ministrler Kabinetiniň Başlygynyň orunbasary E.Orazgeldiýew gözegçilik edýän ulgamynda işleriň ýagdaýy, şeýle hem welaýatlarda dowam edýän möwsümleýin oba hojalyk işleri barada hasabat berdi. Obasenagat toplumyny hem-de welaýatlary ösdürmegiň maksatnamalaryny ýerine ýetirmek maksadynda görülýän çäreler barada hem habar berildi.
Hormatly Prezidentimiz Gurbanguly Berdimuhamedow ýurdumyzyň obasenagat toplumynyň öňünde durýan ilkinji nobatdaky wezipeleriň birnäçesine ünsi çekip, bu ulgamda önümçilik gatnaşyklarynyň täze görnüşlerini, suwarymly meýdanlary netijeli peýdalanmagyň möhümdigini belledi. Ýerleriň önümliligini we oba hojalyk ekinleriň hasyllylygyny ýokarlandyrmak, suwdan rejeli peýdalanmak, önümçilige suw tygşytlaýjy tehnologiýalary giňden ornaşdyrmak üçin anyk çäreleri görmek gerek diýip, milli Liderimiz sözüni dowam etdi.
Öňde boljak pagta ýygymy möwsümi ýurdumyzyň daýhanlary üçin jogapkärli synag bolar diýip, döwlet Baştutanymyz bu möwsüme düýpli taýýarlyk görmegi tabşyrdy. Hormatly Prezidentimiz her welaýatda gök we bakja önümleriniň öndürilýän möçberini yzygiderli artdyrmagyň, oba hojalyk pudagynda işleýän kärendeçileri we hususy telekeçileri hemmetaraplaýyn goldamagyň möhümdigini aýdyp, wise-premýere birnäçe anyk tabşyryklary berdi.
Ministrler Kabinetiniň Başlygynyň orunbasary G.Myradow gözegçilik edýän düzümleriniň alyp barýan işleri hem-de milli Liderimiziň ozal beren tabşyryklarynyň ýerine ýetirilişi barada hasabat berdi.
Hormatly Prezidentimiz Gurbanguly Berdimuhamedow häzirki döwürde ýurdumyzy ösdürmegiň strategiýasy ykdysady maksadalaýyklygyň hem-de ýurdumyzyň uzak möhletleýin bähbitleriniň nukdaýnazaryndan ähli çözgütleriň kabul edilmegini göz öňünde tutýandygyny belledi. Ykdysady ösüşiň ýokary depginlerini saklamak, maýa goýum işjeňligini üpjün etmek, ýurdumyzda öndürilýän önümleriň eksportyny artdyrmak işiň esasy ugurlarynyň hatarynda kesgitlenildi. Ähli edaralaryň we kärhanalaryň maliýe işini netijeli dolandyrmagyň ähmiýeti barada aýtmak bilen, hormatly Prezidentimiz wise-premýere bu işiň geçirilmegini hemişe gözegçilikde saklamagy tabşyrdy.
Soňra Ministrler Kabinetiniň Başlygynyň orunbasary Ç.Gylyjow söwda ulgamynda işleriň ýagdaýy, şeýle hem kiçi we orta telekeçilige döwlet tarapyndan berilýän goldaw boýunça amala aşyrylýan çäreler, Senagatçylar we telekeçiler birleşmesiniň mümkinçiliklerini çekmek bilen, daşary ýurtlardan getirilýän harytlaryň ornuny tutýan önümleriň öndürilişini artdyrmak hem-de daşary ýurtlara iberilýän önümleriň mukdaryny köpeltmek boýunça görülýän anyk çäreler barada hasabat berdi.
Milli Liderimiz hasabaty diňläp, söwda-ykdysady gatnaşyklaryny ösdürmegiň Türkmenistanyň halkara hyzmatdaşlygyny giňeltmegiň esasy aýratynlyklarynyň biridigini belledi. Ulag ýollarynyň çatrygynda ýerleşen ýurdumyzyň amatly geografik ýagdaýy dünýäniň köp döwletleri bilen hyzmatdaşlygy giňeltmek üçin uly mümkinçilikleri açýar.
Hormatly Prezidentimiz ýurdumyzda öndürilýän harytlaryň eksportynyň möçberini artdyrmak, daşary ýurtly hyzmatdaşlar bilen ýakyn işewür gatnaşyklary berkitmek boýunça işleri alyp barmagyň möhümdigini belledi. Türkmen önüm öndürijileriniň bäsdeşlige ukyply harytlaryny ilerletmek üçin daşarky bazarlaryň isleglerini öwrenmegi ileri tutulýan ugurlaryň hatarynda kesgitlemek bilen, milli Liderimiz bu babatda wise-premýere birnäçe görkezmeleri berdi.
Ministrler Kabinetiniň Başlygynyň orunbasary K.Durdymyradow gözegçilik edýän pudaklarynyň alyp barýan işleri, senagat pudagynyň önümçilik düzümini giňeltmek boýunça görülýän çäreler barada hasabat berdi.
Döwlet Baştutanymyz soňky ýyllarda ýurdumyzda halk hojalyk toplumyny giň gerimde senagatlaşdyrmak boýunça strategiýanyň üstünlikli amala aşyrylýandygyny belledi. Geçirilýän netijeli çäreler milli ykdysadyýetimiziň öňdebaryjy senagat toplumlarynyň, şol sanda himiýa we dokma pudaklarynyň, gurluşyk serişdeleri önümçiliginiň we beýlekileriň okgunly ösüşini üpjün etdi.
Milli Liderimiz gaýtadan işleýän pudaklary innowasiýalar esasynda toplumlaýyn diwersifikasiýalaşdyrmagy hem-de döwrebaplaşdyrmagy göz öňünde tutýan ykdysady meýilnama laýyklykda, şolaryň çig mala dahylsyz ösüş ýoluna geçirmek işleriniň amala aşyrylýandygyny belledi. Ekologiýa ölçegleriniň halkara talaplaryna laýyk gelýän ýokary tehnologiýaly önümçilik düzümlerini döretmek, ýurdumyzyň baý tebigy serişdeleriniň esasynda köpdürli we daşarky bazarlarda bäsdeşlige ukyply önümleriň öndürilişini artdyrmak, täze iş orunlaryny döretmek boýunça işleri dowam etmek möhümdir diýip, döwlet Baştutanymyz sözüni dowam etdi.
Hormatly Prezidentimiz elektron hem-de elektrotehniki senagaty ösdürmek, içeri we daşary bazarlar üçin niýetlenen harytlary öndürmek, şeýle hem ýurdumyzyň eksport kuwwatyny artdyrmak boýunça döwlet maksatnamalaryny durmuşa geçirmegiň bazar gatnaşyklaryna geçmegiň şertlerinde esasy ugurlaryň biridigini belledi. Şunuň bilen baglylykda, wise-premýere pudagyň öňünde goýlan wezipeleriň öz wagtynda we degişli derejede ýerine ýetirilmegini üpjün etmek tabşyryldy.
Soňra Ministrler Kabinetiniň Başlygynyň orunbasary M.Çakyýew ulaglar we aragatnaşyk toplumynda işleriň ýagdaýy, onuň maddy-enjamlaýyn binýadyny berkitmek we döwrebaplaşdyrmak boýunça görülýän çäreler barada hasabat berdi. Şeýle hem döwlet Baştutanymyzyň ozal beren tabşyryklarynyň ýerine ýetirilişi barada habar berildi.
Milli Liderimiz hasabaty diňläp, ulag-aragatnaşyk ulgamyny ösdürmek meselelerine häzir aýratyn üns berilýändigini, halkara söwda, ykdysady we medeni aragatnaşyklary berkitmekde bu ulgama möhüm ornuň degişlidigini aýtdy. Soňky ýyllarda demir we awtomobil ýollarynyň, howa, deňiz we derýa ulaglarynyň döwrebap düzümini, ýurdumyzyň telekommunikasiýalar ulgamyny ösdürmäge uly möçberde maýa goýumlary gönükdirilýär.
Ýurdumyzyň geçirýän parahatçylyk söýüjilikli syýasaty sebitiň we dünýäniň döwletleri bilen ulag ulgamynda hyzmatdaşlygy işjeňleşdirmek üçin amatly şertleri döredýär. Gazagystan — Türkmenistan — Eýran, Kerki — Ymamnazar — Akina, Serhetabat — Turgundy halkara ulag geçelgeleriniň gurulmagy hem-de ulanmaga berilmegi ykdysady kuwwatyň pugtalandyrylmagyna uly goşant boldy diýip, hormatly Prezidentimiz Gurbanguly Berdimuhamedow belledi.
Döwlet we sebitara ähmiýetli üstünlikli amala aşyrylýan taslamalar türkmenistanlylaryň abadançylygynyň üpjün edilmegine hem-de beýleki ýurtlaryň halklarynyň bähbitlerine hyzmat edýär, şeýle hem ýurdumyzyň üstaşyr mümkinçilikleriniň artmagyna ýardam berýär diýip, nygtamak bilen döwlet Baştutanymyz bu ulgamda iň täze tehnologiýalaryň giňden ornaşdyrylmagynyň, onuň düzümleriniň mundan beýläk-de kämilleşdirilmeginiň möhümdigini belläp, toplumyň ähli pudaklarynyň maddy-enjamlaýyn binýadyny düýpli döwrebaplaşdyrmak boýunça milli maksatnamalaryň durmuşa geçirilişini gözegçilikde saklamagy tabşyrdy.
Milli Liderimiz Gurbanguly Berdimuhamedow telekommunikasiýalar ulgamynda öňdebaryjy gazananlaryň işjeň peýdalanylmagy, optiki-süýümli aragatnaşyk ulgamyny kemala getirmek boýunça iri möçberli taslamalaryň durmuşa geçirilmegi boýunça alnyp barylýan işleriň netijeli häsiýetini kanagatlanma bilen belläp, bu toplumyň döwrebaplaşdyrylmagynyň milli ykdysadyýetimizi köpugurly ösdürmäge, täze, ylmy taýdan esaslandyrylan taslamalary durmuşa geçirmäge ýardam berýändigini nygtady. Şunuň bilen baglylykda, wise-premýere pudagyň öňünde durýan wezipeleri üstünlikli çözmek üçin geljekde hem zerur bolan çäreleri görmek tabşyryldy.
Soňra Döwlet howpsuzlyk geňeşiniň sekretary, milli howpsuzlyk ministri Ý.Berdiýew goranyş häsiýetli Harby doktrinanyň çäklerinde ýurdumyzyň Ýaragly Güýçleriniň Belent Serkerdebaşysy Gurbanguly Berdimuhamedowyň başyny başlan düýpli özgertmeleriniň durmuşa geçirilişi hakynda habar berdi. Şeýle hem ministr gözegçilik edýän düzüminiň alyp barýan işleri hem-de hormatly Prezidentimiziň ozal beren tabşyryklarynyň ýerine ýetirilişi barada hasabat berdi.
Döwlet Baştutanymyz hasabaty diňläp, hemişelik Bitaraplyk derejesine üýtgewsiz ygrarly bolan ýurdumyzyň parahatçylygyň we asudalygyň, halkymyzyň abadan durmuşynyň goragynda duran gulluklaryň işiniň has-da kämilleşdirilmegine aýratyn üns berýändigini belledi. Milli howpsuzlyk edaralarynyň üstüne döwletimizi, onuň konstitusion gurluşyny goramak boýunça uly jogapkärçilik ýüklenendir diýip, milli Liderimiz Döwlet howpsuzlyk geňeşiniň sekretaryna, MHM-iň ýolbaşçysyna birnäçe anyk görkezmeleri berdi.
Soňra iş maslahatyna çagyrylan harby we hukuk goraýjy edaralaryň ýolbaşçylary garamagyndaky düzümlerde işleriň ýagdaýy, tehnikanyň we enjamlaryň täze görnüşleri bilen üpjün etmek boýunça geçirilýän işler, işgärleriň hünärini kämilleşdirmek, Watan goragçylarynyň birkemsiz gulluk etmegi hem-de olaryň maşgala agzalary üçin amatly şertleri döretmek boýunça geçirilýän işler barada hasabat berdiler. Şeýle hem hormatly Prezidentimiz Gurbanguly Berdimuhamedowyň ýerlerde düzgün-tertibi, ýangyn howpsuzlygyny hem-de ýol-ulag hereketiniň sazlaşyklylygyny, Garaşsyz, Bitarap Watanymyzyň mukaddes çäkleriniň eldegrilmesizligini üpjün etmek, ähli ulgamlarda kanunçylygy berjaý etmek hem-de şunuň bilen baglylykda, ilat arasynda düşündiriş işlerini geçirmek boýunça ozal beren tabşyryklarynyň ýerine ýetirilişi barada habar berildi.
Ýurdumyzyň Ýaragly Güýçleriniň Belent Serkerdebaşysy hasabatlary diňläp, harby we hukuk goraýjy düzümlerde geçirilýän özgertmeleriň esasy ugurlaryna ünsi çekdi. Diňe parahatçylykly hem-de goranyş häsiýetli Harby doktrinanyň düzgünlerine laýyklykda, döwletimiziň howpsuzlygynyň, halkymyzyň asuda we abadan durmuşynyň kepili bolup durýan Milli goşunymyzyň goranyş ukyplylygyny üpjün etmek meselelerini gözegçilikde saklamaly diýip, milli Liderimiz aýtdy.
Geljekde hem ähli harby we hukuk goraýjy edaralaryň maddy-enjamlaýyn binýadyny döwrebaplaşdyrmak, olary döwrebap enjamlar we täze tehnikalar bilen üpjün etmek boýunça degerli çäreleri görmek möhümdir. Hormatly Prezidentimiz Gurbanguly Berdimuhamedow migrasiýa syýasatyny durmuşa geçirmek boýunça netijeli işleri amala aşyrmagyň möhümdigini belläp, dünýäniň ähli künjeklerinden ýurdumyza gelýän myhmanlara döwrüň talaplaryna laýyk gelýän hyzmatlary ýerine ýetirmek barada görkezme berdi. Milli Liderimiz gümrük gullugynyň işgärleriniň üstüne uly jogapkärçiligiň ýüklenendigini belläp, ýerlerde gözegçilik geçiriş bölümleriniň ygtyýarynda bolan döwrebap enjamlary netijeli peýdalanmagy tabşyrdy.
Döwlet Baştutanymyz harby we hukuk goraýjy edaralaryň şahsy düzüminiň hünär derejesini ýokarlandyrmagy ilkinji nobatdaky wezipeleriň hatarynda görkezip, degişli ylym-bilim ulgamynyň ugurlaryny, sportuň harby-amaly görnüşlerini ösdürmegiň, ýaş esgerleri Watana bolan çäksiz söýgi ruhunda terbiýelemegiň möhümdigini belledi.
Hormatly Prezidentimiz iş maslahatynyň netijelerini jemläp, şu günki maslahatyň barşynda bellenilen görkezmeleriň degişli derejede ýerine ýetirilmegi milli ykdysadyýetimiziň has-da sazlaşykly ösmegine, halkymyzyň durmuş derejesiniň ýokarlanmagyna we umuman, ata Watanymyzyň gülläp ösmegine ýardam etmelidir diýip belledi.
Maslahatyň ahyrynda milli Liderimiz Gurbanguly Berdimuhamedow oňa gatnaşanlara öňde goýlan möhüm wezipeleri çözmekde üstünlikleri arzuw etdi.