Türkmenistanyň Prezidenti Gazagystan Respublikasynyň Prezidenti bilen duşuşdy
Hormatly Prezidentimiz Gurbanguly Berdimuhamedow Hazarýaka döwletleriniň Baştutanlarynyň V sammiti tamamlanandan soň, Gazagystan Respublikasynyň Prezidenti Nursultan Nazarbaýew bilen duşuşdy.
Iki ýurduň Liderleri birek-biregi sammitiň üstünlikli geçirilmegi we Hazar deňziniň hukuk derejesi hakyndaky Konwensiýa hem-de bäştaraplaýyn möhüm resminamalara gol çekilmegi bilen gutladylar.
Döwlet Baştutany Gurbanguly Berdimuhamedow Prezident Nursultan Nazarbaýewe mähirli kabul edilendigi we türkmen wekiliýetine bildirilen myhmansöýerlik, sammitiň ýokary guramaçylyk derejesi üçin minnetdarlyk bildirdi hem-de onuň jemleriniň Hazar deňzindäki köpugurly gatnaşyklary öňe ilerletmäge ýardam etjekdigine ynam bildirdi.
Söhbetdeşler şu gün kabul edilen we duşuşyga gatnaşyjy ýurtlaryň ählisi üçin ähmiýetli bolan çözgütler boýunça pikir alyşdylar. Söhbetdeşler şolary durmuşa geçirmek üçin tagallalary utgaşdyrmagyň zerurdygyny belläp, sebitde howpsuzlygy üpjün etmekde we ynanyşmak, birek-birege düşünişmek ýagdaýyny döretmekde, dost-doganlyk gatnaşyklaryny pugtalandyrmakda onuň ähmiýetini nygtadylar.
Prezident Nursultan Nazarbaýew iki döwletiň halklaryny taryhy we doganlyk gatnaşyklarynyň birleşdirýändigini belledi, şeýle hem soňky döwürde biziň ýurtlarymyzyň arasyndaky söwda gatnaşyklarynyň işjeňleşýändigini kanagatlanmak bilen nygtady, şunda olary giňeltmek üçin uly mümkinçilikler bar.
Şu gün biziň gatnaşyklarymyza täze sahypa ýazyldy, bu gatnaşyklar köp asyrlaryň dowamynda emele geldi. Häzirki zaman tapgyrynda ikitaraplaýyn hyzmatdaşlygy mundan beýläk-de giňeltmek üçin ähli serişdeler bar diýip, Türkmenistanyň Prezidenti aýtdy.
Söhbetdeşler ozal gazanylan ylalaşyklary, şeýle hem söwda, energetika we ulag ulgamy ýaly möhüm pudaklardaky bilelikdäki taslamalary işjeňleşdirmek meselelerine ünsi çekip, taraplaryň ikitaraplaýyn we sebitleýin derejelerde ýygjam hyzmatdaşlyga ygrarlydyklaryny tassykladylar.
Türkmenbaşynyň Halkara deňiz porty ulag ulgamyndaky tagallalaryň utgaşdyrylmagynyň möhüm şertini emele getirýär. Munuň özi Gazagystanyň portlary bilen gatnaşyklaryň ýola goýulmagy babatda hem ähmiýetlidir.
Taraplar sammitde öňe sürlen ekologiýa meselesi barada aýtmak bilen, Araly halas etmegiň Halkara gaznasynyň çäklerinde ýola goýlan gatnaşyklary ara alyp maslahatlaşdylar hem-de gaznany esaslandyryjy döwletleriň Baştutanlarynyň awgust aýynyň soňky ongünlüginde geçiriljek duşuşygynyň gün tertibine Hazaryň türkmen kenaryndaky «Awaza» milli syýahatçylyk zolagyny ösdürmek meselesi girizildi.
Duşuşygyň ahyrynda Prezidentler Gurbanguly Berdimuhamedow we Nursultan Nazarbaýew dostluk we netijeli hyzmatdaşlyk gatnaşyklaryna iki ýurduň ygrarlydygyny tassyklap, bu gatnaşyklaryň mundan beýläk-de iki doganlyk hem-de goňşy halklaryň abadançylygynyň bähbidine üstünlikli ösdüriljekdigine ynam bildirdiler.